Awara By Majaz

shahr kī raat aur maiñ nāshād o nākārā phirūñ 

jagmagātī jāgtī saḌkoñ pe āvārā phirūñ 

ġhair kī bastī hai kab tak dar-ba-dar maarā phirūñ 

ai ġham-e-dil kyā karūñ ai vahshat-e-dil kyā karūñ 





jhilmilāte qumqumoñ kī raah meñ zanjīr sī 

raat ke hāthoñ meñ din kī mohnī tasvīr sī 

mere siine par magar rakhī huī shamshīr sī 

ai ġham-e-dil kyā karūñ ai vahshat-e-dil kyā karūñ 





ye rupahlī chhāñv ye ākāsh par tāroñ kā jaal 

jaise suufī kā tasavvur jaise āshiq kā ḳhayāl 

aah lekin kaun jaane kaun samjhe jī kā haal 

ai ġham-e-dil kyā karūñ ai vahshat-e-dil kyā karūñ 





phir vo TuuTā ik sitāra phir vo chhūTī phul-jaḌī 

jaane kis kī god meñ aa.ī ye motī kī laḌī 

huuk sī siine meñ uTThī choT sī dil par paḌī 

ai ġham-e-dil kyā karūñ ai vahshat-e-dil kyā karūñ 





raat hañs hañs kar ye kahtī hai ki mai-ḳhāne meñ chal 

phir kisī shahnāz-e-lāla-ruḳh ke kāshāne meñ chal 

ye nahīñ mumkin to phir ai dost vīrāne meñ chal 

ai ġham-e-dil kyā karūñ ai vahshat-e-dil kyā karūñ 





har taraf bikhrī huī rañgīniyāñ ra.anā.iyāñ 

har qadam par ishrateñ letī huī añgḌā.iyāñ 

baḌh rahī haiñ god phailā.e hue rusvā.iyāñ 

ai ġham-e-dil kyā karūñ ai vahshat-e-dil kyā karūñ 





rāste meñ ruk ke dam le luuñ mirī aadat nahīñ 

lauT kar vāpas chalā jā.ūñ mirī fitrat nahīñ 

aur koī ham-navā mil jaa.e ye qismat nahīñ 

ai ġham-e-dil kyā karūñ ai vahshat-e-dil kyā karūñ 





muntazir hai ek tūfān-e-balā mere liye 

ab bhī jaane kitne darvāze haiñ vā mere liye 

par musībat hai mirā ahd-e-vafā mere liye 

ai ġham-e-dil kyā karūñ ai vahshat-e-dil kyā karūñ 





jī meñ aatā hai ki ab ahd-e-vafā bhī toḌ duuñ 

un ko pā saktā huuñ maiñ ye aasrā bhī toḌ duuñ 

haañ munāsib hai ye zanjīr-e-havā bhī toḌ duuñ 

ai ġham-e-dil kyā karūñ ai vahshat-e-dil kyā karūñ 





ik mahal kī aaḌ se niklā vo piilā māhtāb 

jaise mullā kā amāma jaise baniye kī kitāb 

jaise muflis kī javānī jaise beva kā shabāb 

ai ġham-e-dil kyā karūñ ai vahshat-e-dil kyā karūñ 





dil meñ ik sho.ala bhaḌak uTThā hai āḳhir kyā karūñ 

merā paimāna chhalak uTThā hai āḳhir kyā karūñ 

zaḳhm siine kā mahak uTThā hai āḳhir kyā karūñ 

ai ġham-e-dil kyā karūñ ai vahshat-e-dil kyā karūñ 





jī meñ aatā hai ye murda chāñd taare noch luuñ 

is kināre noch luuñ aur us kināre noch luuñ 

ek do kā zikr kyā saare ke saare noch luuñ 

ai ġham-e-dil kyā karūñ ai vahshat-e-dil kyā karūñ 





muflisī aur ye mazāhir haiñ nazar ke sāmne 

saikḌoñ sultān-e-jābir haiñ nazar ke sāmne 

saikḌoñ chañgez o nādir haiñ nazar ke sāmne 

ai ġham-e-dil kyā karūñ ai vahshat-e-dil kyā karūñ 





le ke ik chañgez ke hāthoñ se ḳhanjar toḌ duuñ 

taaj par us ke damaktā hai jo patthar toḌ duuñ 

koī toḌe yā na toḌe maiñ hī baḌh kar toḌ duuñ 

ai ġham-e-dil kyā karūñ ai vahshat-e-dil kyā karūñ 





baḌh ke us indar sabhā kā saaz o sāmāñ phūñk duuñ 

us kā gulshan phūñk duuñ us kā shabistāñ phūñk duuñ 

taḳht-e-sultāñ kyā maiñ saarā qasr-e-sultāñ phūñk duuñ 

ai ġham-e-dil kyā karūñ ai vahshat-e-dil kyā karūn

By asrar ul haq majaz