Har Lamha By Ahmed Mushtaq

Har lamha zulmaton ki khudai ka waqt hai,
Shayad kisi ki chehra-numai ka waqt hai,

Kehti hai sahilon se yeh aate samay ki dhoop,
Hoshyar nadiyon ki chaRRhayi ka waqt hai,

Hoti hai sham ankh se aansu rawan huye,
Yeh waqt qaidiyon ki rehayi ka waqt hai,

Koi bhi waqt ho kabhi hota nahin juda,
Kitna aziz us ki judai ka waqt hai,

Dil ne kaha ke sham-e- shab-e- vasl se na bhaag,
Ab pak chuki hai fasl kaTTayi ka waqt hai,

Main ne kaha ke dekh yeh hava yeh raat,
Us ne kaha ke meri paRRhayi ka waqt hai..

By Ahmed Mushtaq